
香巴噶舉教言集NG27མགོན་པོ་ཡིད་བཞིན་ནོར་བུའི་སྒྲུབ་སྐོར་བཞུགས་སོ།།
1-309
༄༅། །མགོན་པོ་ཡིད་བཞིན་ནོར་བུའི་སྒྲུབ་སྐོར་བཞུགས་སོ།།
༄། །མགོན་པོ་ཡིད་བཞིན་ནོར་བུའི་རྗེས་གནང་།
༄༅། །མགོན་པོ་ཡིད་བཞིན་ནོར་བུའི་སྒྲུབ་སྐོར་བཞུགས་སོ།། ཨོཾ་སྭསྟི་སིདྡྷཾ། མགོན་པོ་ཡིད་བཞིན་ནོར་བུའི་རྗེས་གནང་ལ་གནས་དབེན་པ་དམ་ཚིག་མི་གཙང་བ་དང་གྲིབ་ལ་སོགས་པའི་སྐྱོན་དང་བྲལ་ཞིང་།
བཀྲ་ཤིས་པའི་གནས་སུ་ས་གཞི་ཕྱག་དར་དང་ཆག་ཆག་ལེགས་པར་བྱས། དཀོན་མཆོག་གི་རྟེན་དང་ཁྱད་པར་མགོན་པོ་འདིའི་བྲིས་སྐུ་སོགས་ལེགས་པར་བཤམ། ས་གཞི་དྲི་བཟང་གིས་བྱུགས་པར་མཎྜལ་པདྨ་
དཀར་པོ་འདབ་མ་བཞི་པ་ལྟེ་བར་ཉི་མའི་དཀྱིལ་འཁོར་དང་བཅས་པ་མཐའ་རིས་སྐོར་བ་བྲི། ལྟེ་བ་ལ་ཧཱུྃ་དཀར་པོ་བྲི། མཐའ་མཆོད་པ་དང་སྤྱན་གཟིགས་ཀྱིས་བསྐོར། ཟས་སྣ་ཚོགས་རྙེད་ཚད་
བཤམ། མཎྜལ་གྱི་སྟེང་དུ་མཉྫི་ལ་སོགས་པའི་ཐོག་ཏུ། གཏོར་མ་དཔལ་བཤོས་ཟུར་གསུམ་མར་གྱི་ནོར་བུ་དང་། སྦྲང་རྩི་ལ་སོགས་པས་བརྒྱན་ཅིང་། མདའ་བྱ་རྒོད་མ་དར་དང་མེ་ལོང་དང་མགོན་པོ་
འདིའི་ཙཀླི་བཏགས་པ་བཙུགས་ལ་བཞག་པར་བྱའོ། །དེ་ནས་སློབ་དཔོན་རང་ཉིད་མགོན་པོའི་བསྒོམ་བཟླས་དང་། མདུན་བསྐྱེད་ཀྱི་མཎྜལ་བསངས་སྦྱངས། དབུས་ཀྱི་ཧཱུྃ་ལས་མགོན་པོར་བསྐྱེད་ཅིང་། ཡེ་ཤེས་པ་སྤྱན་དྲངས་ནས་
གཞུག་པ་དང་། གསོལ་འདེབས་མཆོད་བསྟོད། གཏོར་མ་དབུལ་བ་རྣམས་རྫོགས་པར་བྱས་ནས་སློབ་མ་གཅིག་ཁྲུས་བྱས་ནས་གསེར་གྱི་མཎྜལ་ཕུལ་ཏེ་མདུན་དུ་འདུག་པ་ལ། སྤྱིར་མགོན་པོ་ཐུགས་བསྐྱེད་ཚུལ་དང་། ཁྱད་པར་མགོན་པོ་འདི་ཉིད་ཆོས་སྒྲུབ་པའི་མཐུན་རྐྱེན་དགོས་འདོད་མ་ལུས་པ་སྩོལ་ཞིང་དབུལ་བའི་རྒུད་པ་མཐའ་དག་ལས་སྐྱོབ་པ་དང་། 
1-310
དེའི་གདམས་པ་ཁྱད་པར་ཅན་བླ་མ་རཱ་ཧུ་ལས། བླ་མ་ཁྱུང་པོ་ལ་འཕན་ཡུལ་ཇོག་པོའི་རི་ལ་བཞུགས་དུས། རྒྱ་གར་ནས་ནམ་ལངས་པ་ལ་བྱོན་ནས། འཕན་ཡུལ་དུ་ཉི་མ་མ་ཤར་
ཙམ་ལ་ཕེབས་པ་མཛད་དེ། མན་ངག་སྒོས་སྐྱེལ་མཛད་པའི་ལོ་རྒྱུས་རྣམས་བཤད་ནས་སྤྲོ་བ་བསྐྱེད། དཀོན་མཆོག་གསུམ་ལ་བདག་སྐྱབས་མཆི། །ཞེས་སོགས་ལན་གསུམ་གྱིས་སེམས་བསྐྱེད་ཅིང་སྡོམ་པ་འཛིན་དུ་གཞུག
སློབ་མས་ཐལ་མོ་སྙིང་ཁར་སྦྱར་ཏེ། གང་གི་དྲིན་གྱིས་བདེ་ཆེན་ཉིད། །ཞེས་སོགས་ཀྱི་མཐར། ཁྱེད་ཞབས་པད་མོ་སྤངས་ནས་ནི། །སོགས་སྦྱར་བ་ལན་གསུམ་གྱིས་གསོལ་བ་གདབ། བླ་མ་རྗེ་བཙུན་ཁ་
སར་པ་ནི་སྐུ་མདོག་དཀར་པོ་ཞལ་གཅིག་ཕྱག་གཉིས་མཉམ་པའི་སྟབས་ཀྱིས་སྐུ་བཞེངས་པའི་ཐུགས་ཀར་ཡིད་བཞིན་ནོར་བུ། དེའི་ཐུགས་ཀར་དབང་སྡུད་ཀྱི་མཁའ་འགྲོ་མ་དམར་མོ། །དེའི་ཐུགས་ཀར་ཐིག་ལེ་
དམར་པོ་རྒྱ་སྲན་ཙམ་པ། དེའི་སྟེང་དུ་ཧཱུྃ་དཀར་ལ་དམར་བའི་མདངས་ཆགས་པ་སློབ་མས་བསྒོམ་ཞིང་། དེ་ལ་མོས་འདུན་དྲག་པོ་བྱེད་དུ་གཞུག སློབ་མ་ཐ་མལ་དུ་གནས་པའི་སྙིང་ཁར་ཐིག་
ལེ་དམར་པོ་གཅིག་གི་སྟེང་དུ་ཐིག་ལེ་དཀར་པོ་གཅིག་བསྒོམ། དེ་ལས་འོད་ཟེར་འཕྲོས། དོན་གཉིས་བྱས། ཚུར་འདུས་ཡོངས་སུ་གྱུར་པ་ལས། མགོན་པོའི་སྐུ་ཇི་ལྟ་བར་བསྐྱེད་པའི་ཐུགས་ཀར་པད་ཉིའི་སྟེང་དུ། 
1-311
ཐིག་ལེ་དམར་པོའི་སྟེང་དུ་ཧཱུྃ་དཀར་པོ་དང་བཅས་པ་སྒོམ་དུ་བཅུག་ནས་སློབ་མས་མོས་འདུན་དྲག་པོས་ཐར་མོ་སྦྱར་ཏེ། བདག་ལ་སྐུའི་སྒོ་ནས་བྱིན་གྱིས་བརླབ་ཏུ་གསོལ་ཞེས་གསོལ་བ་བཏབ།
དཔོན་སློབ་གཉིས་ཀའི་ཐུགས་ཀའི་ཧཱུྃ་ལས་འོད་འཕྲོས། བསིལ་བའི་ཚལ་ནས་མགོན་པོ་འཁོར་དང་བཅས་པ་སྤྱན་དྲངས་སློབ་མ་ལ་བསྟིམ། བླ་མ་རྣམས་ཀྱི་མཚན་ནས་བརྗོད་ནས་ཡེ་ཤེས་ཀྱི་མགོན་པོ་ཁྱེད་
ཀྱིས་རྡོ་རྗེ་སློབ་མ་འདི་ཞེས་བྱ་བའི་ཕྱི་བཞིན་དུ་རྒྱུག་ལ་ལུས་དང་གྲིབ་མ་བཞིན་དུ་འགྲོགས་ནས་སངས་རྒྱས་མ་ཐོབ་ཀྱི་བར་དུ་འཕྲིན་ལས་གང་བསྒོ་བ་སྒྲུབས་ཤིག་ཅེས་བཀའ་བསྒོ་ལན་
གཅིག་བྱའོ། །གསུང་གི་རྗེས་གནང་ནི། བླ་མ་ལ་བདག་ལ་ཡེ་ཤེས་ཀྱི་མགོན་པོའི་གསུང་གི་བྱིན་རླབས་བསྩལ་དུ་གསོལ་ཞེས་གསོལ་བ་བཏབ། བླ་མ་ཁ་སར་པ་ནིའི་ཐུགས་ཀའི་མགོན་པོའི་ཐུགས་ཁར་
ཧཱུྃ་དཀར་པོ་ལ་སྙིང་པོ་ཡིག་འབྲུ་བཅུ་གསུམ་གྱིས་བསྐོར་བ་བཀོད། དེ་ལས་སྔགས་ཀྱི་ཕྲེང་བ་མར་མེ་གཅིག་ལས་གཉིས་མཆེད་ཀྱི་ཚུལ་དུ་བྱུང་སྟེ། སློབ་མའི་ཁ་ནས་ཞུགས། སྙིང་ཁར་ཧཱུྃ་དཀར་
པོའི་མཐའ་ལ་འཁོར་བར་དམིགས་ནས་སྔགས་ཀྱི་རྗེས་སུ་ཟློས་པ་ལན་བཅུ་གསུམ་བྱ། བཀའ་སྒོ་སྔར་ལྟར་བྱའོ། །དེ་ནས་ཡང་སློབ་མས་བདག་ལ་ཡེ་ཤེས་ཀྱི་མགོན་པོའི་ཐུགས་ཀྱི་བྱིན་རླབས་བསྩལ་དུ་གསོལ་ཞེས་གསོལ་བ་བཏབ། 
1-312
བླ་མའི་ཐུགས་ཀའི་པད་ཉིའི་སྟེང་དུ་ཐིག་ལེ་དམར་པོའི་སྟེང་དུ་ཧཱུྃ་དཀར་ལ་འཚེར་བའི་ནང་དུ་སངས་རྒྱས་མཁའ་འགྲོ་དེའི་ཕྱོགས་བཞིར་མཁའ་འགྲོ་རིགས་བཞི་བཞུགས། དེ་དག་བླ་མའི་ཤངས་བུག་ནས་
འཐོན། སློབ་མའི་སྣ་བུག་གཡོན་ནས་སྙིང་ཁར་ཞུགས་པར་བསམས་ནས་བཀའ་སྒོ་སྔར་ལྟར་བྱའོ། །ཡང་སློབ་མས། བདག་ལ་ཡེ་ཤེས་ཀྱི་མགོན་པོའི་འཕྲིན་ལས་ཀྱི་བྱིན་རླབས་བསྩལ་དུ་གསོལ་ཞེས་གསོལ་བ་བཏབ།
བླ་མའི་རྩ་འཁོར་བཞི་དང་སྨིན་ཕྲག་དང་ལྔར་མཁའ་འགྲོ་སྡེ་ལྔ་ཚན་པ་ལྔ་བསྒོམ། བླ་མའི་སྐུའི་མཁའ་འགྲོ་དེ་དག་ལས་མཁའ་འགྲོ་དཔག་ཏུ་མེད་པ་འཕྲོས། བླ་མའི་ཐུགས་ཀའི་མགོན་པོའི་ཞབས་
འོག་གི་ཚོགས་བདག་གི་ཐུགས་ཁ་ནས་ཀྱང་འོད་ཟེར་ལྕགས་ཀྱུ་ལྟ་བུ་དཔག་ཏུ་མེད་པ་འཕྲོས། ནོར་ལྷ་སོགས་དང་འཇིག་རྟེན་པའི་འབྱུང་པོ་མཐུ་ཆེ་བ་རྣམས་དང་། བསྒྲུབ་བྱ་དབང་དུ་བྱ་བར་
འདོད་པ་དེ་དག་བཀུག་སྟེ་ཚོགས་བདག་ལ་བསྟིམ། བླ་མའི་རྩ་འཁོར་བཞི་ཡི་མཁའ་འགྲོ་རྣམས་དབུ་མའི་ནང་ན་ཡར་སོང་སྨིན་ཕྲག་གི་མཁའ་འགྲོ་ལ་ཐིམ། དེ་རྣམས་ལས་མཁའ་འགྲོ་དཔག་ཏུ་མེད་
པ་འཕྲོས། རིགས་དེ་འདྲ་བ་དཔག་ཏུ་མེད་པ་དབང་དུ་བསྡུས། སློབ་མའི་སྨིན་ཕྲག་གི་མཁའ་འགྲོ་ལྔ་ལ་ཐིམ་པར་བསམ་མོ། །ཐོད་པའི་ནང་གི་བུམ་པ་རིན་པོ་ཆེས་ཁེངས། དེ་ལུད་པས་ཐོད་པ་ཁེངས་ཏེ་ལུད་པར་བསམ་མོ། །
1-313
དེ་ནས་སྒྲུབ་པའི་ལུང་སྦྱིན། ཚོགས་བྱིན་གྱིས་བརླབས་ཏེ་རྒྱས་པར་དབུལ་ཞིང་ལོངས་སྤྱོད། དགེ་བའི་རྩ་བ་བསྔོ། བཀྲ་ཤིས་དང་སྨོན་ལམ་སོགས་བྱའོ།། །།མངྒལཾ།། །།ཤུ་བྷཾ།། །།
༄། །བཅོམ་ལྡན་ཡིད་བཞིན་ནོར་བུའི་སྒྲུབ་པའི་ཐབས་དགོས་པ་ཀུན་འབྱུང་བའི་དབང་གི་རྒྱལ་པོ་དངོས་གྲུབ་མ་ལུས་པའི་བདག་ཉིད།
༄༅། །བླ་མ་མགོན་པོ་ཌཱ་ཀིའི་ཞབས་
བཏུད་ནས། །མྱུར་མཛད་ཐུགས་རྗེ་ཅན་ལ་ཕྱག་འཚལ་ལོ། །བཅོམ་ལྡན་ཡིད་བཞིན་ནོར་བུའི་སྒྲུབ་པའི་ཐབས་དགོས་པ་ཀུན་འབྱུང་བའི་དབང་གི་རྒྱལ་པོ་དངོས་གྲུབ་མ་ལུས་པའི་བདག་ཉིད་རིན་པོ་ཆེ་ལ་
དོན་བཞི་སྟེ། ལོ་རྒྱུས། སྦྱོར་བ། དངོས་གཞི། རྗེས་སོ། །
༈ ལོ་རྒྱུས། སྦྱོར་བ།
དེ་ལ་འདིའི་ལོ་རྒྱུས་ནི། རྒྱས་པར་གཞུང་དུ་གསལ་ལོ། །དགོས་དོན་ནི། རྣལ་འབྱོར་གྱི་དབང་ཕྱུག་ཆེན་པོ་རཱ་ཧུ་ལ་གུཔྟ་བཛྲ་ཡིས་བདག་
ཁྱུང་པོ་རྣལ་འབྱོར་ལ་བརྩེ་བ་ཆེན་པོས་བོད་ཡུལ་དབུས་སུ་སྐྱེལ་དུ་བྱོན་པའི་གདམས་པའོ། །འདིའི་སྦྱོར་བ་ལ་གཉིས་ལས་དང་པོ་བླ་མ་མགོན་པོ་དབྱེར་མེད་ལ་སོགས་པའི་དབང་ཞུ། རྒྱུད་སྨིན་
པར་བྱེད་པ་ཡིན་པས་དངོས་ལ་གསོལ་བ་ལོ་ཟླའི་བར་དུ་གདབ། གཉིས་པ་འདི་རང་གི་བཀའ་ཞུ། གསུམ་པ་རིན་པོ་ཆེ་བསམ་འཕེལ་འདིའི་རྫས་བསོག་པ་ནི། བྲིས་སྐུ་བཞེངས་ལ་རབ་གནས་གཞུང་
བཞིན་བྱའོ། །མཎྜལ་མདའ་གང་བ་ལ་དྲི་བཟང་གིས་ཆག་ཆག་གདབ། བྲི་ལུགས་ནི། དབུས་ལྟེ་བ་དཀར་ལ་པད་མ་འདབ་བཞི་ཕྱོགས་མཚོན་ནོ། །དེ་ཡན་ཆད་དཀྱིལ་འཁོར་སྤྱི་དང་མཐུན་ནོ། །བྲིས་སྐུ་བཞེངས་པ་ནི། 
1-314
སྐུ་མདོག་ཕྱག་མཚན་སོགས་འདིའི་གཞུང་ལྟར་བྱ། རས་གཞིའི་སྐྱ་ཞལ་གྱི་གསེབ་ཏུ་གྲི་ཁྲག་སིན་དྷུ་ར་བླ་མ་བཟང་པོའི་གདུང་རིན་པོ་ཆེ་སྣ་ཚོགས་རྣམས་ཕྱེ་མར་བྱས་ཏེ་སྦྱར་བ་སྐར་མ་
རྒྱལ་གྱི་སྔ་དྲོའི་ཆ་ལ་བྱུག དེའི་སྟེང་དུ་མགོན་པོའི་རྩ་སྔགས་སྟོང་ལ་སོགས་པ་བཟླས་ལ་བྱུག དེའི་སྟེང་རྩ་སྔགས་སི་ཏི་མ་ཤོང་ཚད་བྲི། ལྷ་བཟོ་དབང་པོ་ཚང་བ། ཕྱུག་པ། སྡོམ་
པ་དང་ལྡན་པ་གཅིག་གིས་ཁ་བྱང་དུ་བསྟན་ལ་བྲིའོ། །དེའི་ཉིན་པར་དངོས་གྲུབ་འབྱུང་བའི་གནད་རིག་མ་མཚན་ཉིད་དང་ལྡན་པ་ཞིག་བཙལ་ལ་ཟས་སྣ་ཚོགས་བྱའོ། །རབ་གནས་སྤྱིར་སྤྱི་དང་མཐུན་
ལ། ཡིད་ལ་འདོད་དགུ་སྩོལ་བའི་དངོས་གྲུབ་ཞུ་བའི་གསོལ་བ་ཡེ་ཤེས་པ་ལ་བཏབ་ནས་ཡེ་ཤེས་དགུག་གཞུག་བརྒྱ་རྩ་ལ་སོགས་པ་བྱེད་པ་མན་ངག་ཡིན་ཏེ་འདི་ཞལ་ཤེས་ཡིན་ནོ། །དངོས་
གཞི་ནི་གནས་མཚན་ཉིད་དང་ལྡན་པར་གོང་གི་བཅའ་གཞི་རྣམས་ལེགས་པར་ཚོགས་པར་བྱས་ཏེ། སྟན་བདེ་བ་ལ་འདུག སྐྱབས་འགྲོ་སེམས་བསྐྱེད་སྤྱི་དང་མཐུན་པར་བྱའོ། །ཁྱད་པར་དུ་སེམས་ཅན་ཐམས་ཅད་
དབུལ་བའི་སྡུག་བསྔལ་དང་བྲལ་བར་བྱ། མཐར་ཐུག་རྫོགས་པའི་སངས་རྒྱས་ཀྱི་ས་ལ་དགོད་པར་བྱ། དེའི་ཕྱིར་དུ་འདི་བསྒོམས་ལ་གསོལ་བ་གདབ་པ་དང་བཟླས་པ་སོགས་བྱའོ་སྙམ་དུ་སྙིང་ཐག་པ་ནས་ཁ་ཙམ་ཚིག་ཙམ་མ་ཡིན་པར་བྱ། 
1-315
དེ་ནས་ཐ་མལ་དུ་གནས་པའི་སྙིང་གི་དཀྱིལ་དུ་ཐིག་ལེ་དམར་པོ་རྒྱ་སྲན་ཙམ་པ་གཅིག་བསྒོམ། དེའི་དཀྱིལ་དུ་ཧཱུྃ་དཀར་པོ་དངུལ་ཆུའི་མདོག་འདྲ་བ་གཅིག་བསྒོམ། དེ་གཉིས་ལས་འོད་འཕྲོས་དོན་
གཉིས་བྱས་ཚུར་འདུས་ཡོངས་སུ་གྱུར་མ་ལས་ཡི་གེ་ཧཱུྃ་དང་བཅས་པ་འོད་དང་འོད་ཟེར་དཔག་ཏུ་མེད་པ་འཕྲོ་བ་གཅིག་བསྒོམ། དེ་ལ་སེམས་གཏད་དེ་བསྒོམས་པས་དེ་གཉིས་ཕྲུག་གིས་འདྲེས་པ་
ལས། རང་གི་མདུན་དུ་བཅོམ་ལྡན་འདས་ཡིད་བཞིན་གྱི་ནོར་བུ་སྐུ་མདོག་དཀར་ལ་དམར་བའི་མདངས་ཆགས་པ། སྤྱན་གསུམ་པ། ཕྱག་དྲུག་པ། ཕྱག་གཡས་ཀྱི་དང་པོ་གྲི་གུག་འཕྱར་བ། གཉིས་པ་ནོར་
བུ། གསུམ་པ་ཌཱ་མ་རུ། གཡོན་གྱི་དང་པོ་ཐོད་པ་དང་བུམ་པ་རིན་པོ་ཆེ་སྣ་ཚོགས་ཀྱིས་བཀང་བ་བརླ་གཡོན་པ་ལ་བརྟེན་ཏེ་འཛིན་པ། བར་པ་རྩེ་གསུམ། ཐ་མ་ལྕགས་ཀྱུ་སྣོམ་
པ། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། སྨད་རིན་པོ་ཆེའི་ཆུན་འཕྱང་སྣ་ཚོགས་ཀྱིས་མཛེས་པའོ། །ཞབས་དུར་ཁྲོད་ཆེན་པོ་བསིལ་བ་ཚལ་ནས་ད་ལྟ་རང་འབྱོན་པ་འདྲ་བ། འགྲོ་འཕྲོ་ལ་
བཞུགས་པ་འདྲ་བའི་འོག་ན་ཚོགས་བདག་རེ་རེ་མནན་ཏེ། ཁ་དང་བཤང་ལམ་ཐམས་ཅད་ནས་རིན་པོ་ཆེ་ལྷུག་ལྷུག་ཡོད་པ་འདྲ་བ་གཉིས་བསྐྱེད། མགོན་པོའི་སྤྱི་བོར་བླ་མ་རྡོ་རྗེ་འཆང་དགོས་འདོད་ཐམས་ཅད་འབྱུང་བ་ཞལ་འཛུམ་བག་དང་ལྡན་པ་གཅིག་བསྒོམ། 
1-316
མགོན་པོའི་ཐུགས་ཀར་དབང་སྡུད་ཀྱི་མཁའ་འགྲོ་མ་དམར་མོ་ཞལ་གཅིག་ཕྱག་གཉིས་རྒྱན་སྣ་ཚོགས་ཀྱིས་བརྒྱན་པ། ཕྱག་གཡས་ལྕགས་ཀྱུ། གཡོན་ཐོད་པ་སྣོམ་པ། ཞབས་གར་སྟབས་སྤྱན་གསུམ་ནམ་མཁའ་ལ་ཧྲིག་
གེ་གཟིགས་པ་ཁམས་གསུམ་དབང་དུ་སྡུད་པ་གཅིག་བསྐྱེད། དེའི་སྙིང་ཁར་ཆོས་ཉིད་ཀྱི་ཐིག་ལེ་དམར་པོ་འོད་ཟེར་དམར་པོ་འཕྲོ་བ་གཅིག་བསྐྱེད། དེ་ལས་འོད་འཕྲོས་པས་དུར་ཁྲོད་ཆེན་པོ་བསིལ་བ་
ཚལ་ནས། མགོན་པོ་མཁའ་འགྲོ་མའི་ཚོགས་ཀྱིས་བསྐོར་བ་བསམ་གྱིས་མི་ཁྱབ་པ་སྤྱན་དྲངས། ཛཿཧཱུྃ་བཾ་ཧོཿ གཉིས་སུ་མེད་པར་བྱ། ཕྱི་མཆོད་ནང་མཆོད་དབུལ། བསྙེན་པའི་དུས་སུ་ཐིག་ལེ་དེ་ལ་རྩ་
སྔགས་ཀྱི་གཡས་ནས་བསྐོར་བར་བསམ་ལ་བསྙེན་སྔགས་ཆུ་བོའི་གཞུང་བཞིན་འབུམ་ཕྲག་གསུམ། སྔགས་གཞན་དང་མི་བསྲེ་བར་ཚིག་གཞན་གྱིས་བར་མ་ཆད་པར་བཟླས་སོ། །བཟླས་བྱའི་སྔགས་ནི་འདིའོ། །གུ་རུ་མ་
ཧཱ་ཀཱ་ལ། ཧ་རི་ནི་ས། སི་ཏི་ཛ། ཡི་གེ་འབྲུ་བཅུ་གསུམ། གནད་ཀྱི་གི་གུ་བཞི་དང་ཞབས་ཀྱུ་གཉིས་ཁམས་གསུམ་དབང་སྡུད་ཀྱི་སྙིང་པོའོ། །རྟགས་ནི། བླ་མ་དུར་ཁྲོད་ནས་དངོས་སུ་
བྱོན་པ་དང་། རིག་མ་མཚན་ལྡན་གྱིས་དངོས་གྲུབ་སྟེར་བ་དང་། ཞལ་མཐོང་བ་དང་ཁམས་གསུམ་གྱི་སེམས་ཅན་ལ་དབང་བསྐུར་བ་རྨི་བ་སོགས་སོ། །ཉམས་སྣང་དང་མངོན་སུམ་དུ་འབྱུང་ངོ་། །བཅོམ་ལྡན་འདས་ལ་གཏོར་མ་འབུལ་བ་ནི། 
1-317
ཟུར་གསུམ་ཁྲུ་གང་བ་ཤ་ཁྲག་གི་རྒྱན་དང་། ཟས་སྣ་ཚོགས་ཡོད་ཚད་བསགས་ནས་གཏོར་མ་སྣོད་ཁེངས་པ་བཤམས་ལ་དཀྱིལ་འཁོར་གྱི་དབུས་སུ་བཞག དེ་ལ་བྲིས་སྐུ་གཟུགས། གཡས་སུ་མཁའ་འགྲོ་སྤྱི་
གཏོར། གཡོན་དུ་གཞི་བདག་གཏོར་མ། རྒྱབ་ཏུ་གནོད་སྦྱིན་གཏོར་མ། མདུན་དུ་མཆོད་པ་རྣམ་ལྔ་ཅི་འབྱོར་བ་བཤམ། གནད་གཅིག་ལ་འདིའི་ལུང་ཞུ་བ་དང་། སྒྲུབ་པ་བྱེད་དུས་སམ། ཚེས་བཅུ་ལ་གཏོར་
མ་བྱེད་དུས་ཟས་སྣ་ཚོགས་འབྱོར་ཚད་བསགས་ལ་ཚོགས་འཁོར་བྱེད་པ་གལ་ཆེ། རྗེས་གནང་ཞུ་དུས་ཕྱག་རྟེན་གང་ཕུལ་བ་དེ་དངོས་གྲུབ་ཀྱི་ཐོག་མར་འབྱུང་། དེ་ལྟ་མིན་ན་དངོས་གྲུབ་ཡལ་གསུང་།
དམ་ཚིག་ལྡན་པའི་རྣལ་འབྱོར་པས། །ཚོགས་འཁོར་བཤམས་དང་བཅས་པས་འགྲུབ། །ཅེས་ཡིད་བཞིན་ནོར་བུའི་རྒྱུད་ལ་སོགས་དེ་ཡིས་བསྐྱེད་པའི་རིམ་པ་བསྟན་ནས་རྫོགས་པའི་རིམ་པ་ནི། རང་གི་སེམས་ཉིད་ཐིག་
ལེ་དམར་པོར་གྱུར་པ་སྙིང་ཁ་ན་ཡོད་པ་དེ་ལ་སེམས་གཏད་དེ། རྩེ་གཅིག་ཏུ་བཞག་པས་སེམས་བཟུང་བས་གཏན་ལ་ཕེབས། ཡི་གེ་འོད་དུ་ཞུ་བ་ཡལ་སོང་བའི་ངང་ལ་ཅི་ཙམ་གནས་
ཀྱི་བར་ལ་བཞག་གོ །བཞག་པའི་ངང་ནས་རིག་རིག་པ་དེ་རིག་སྟོང་། འགྱུ་འགྱུ་བ་དེ་འགྱུ་སྟོང་། མ་སྒྲིབ་པར་གསལ་ལེ་བ་དེ་གསལ་སྟོང་། ཡིན་མིན་གྱི་མཐའ་དང་བྲལ་བས་རྨི་ལམ་གྱི་སྣང་བ། 
1-318
སྒྱུ་མའི་རང་བཞིན་ཞེས་པ་དེ་ལ་གབ་སྟེ་ངོ་སྤྲད་པ་དེའོ། །དེ་ནི་རྫོགས་པའི་རིམ་པའོ། ། དེའི་སྟེང་ནས་ཉལ་འཆག་འགྲོ་འདུག་གི་སྣང་བ་ཡང་དེ་ཁོ་ན་བཞིན་དུ་ཉམས་སུ་ལེན་པ་
ཁོ་བོ་ཁྱུང་པོ་རྣལ་འབྱོར་གྱི་སྤྱོད་ཚུལ་ལོ། །སྒྲུབ་པ་འདི་ལ་གསོལ་འདེབས་ཁོ་ན་གལ་ཆེ། སྒྲུབ་པ་ཐོན་ནས་ཡེ་ཤེས་གཤེགས། དམ་ཚིག་པ་རང་ལ་བསྡུ། གཏོར་མ་ཆེ་བ་དངོས་གྲུབ་ཏུ་
ལེན་པ་ཡིན། དམ་ཉམས་ཀྱི་ཁར་མི་སྦྱིན། ཁྱི་དང་བ་ལང་ལ་མི་སྦྱིན། གཏོར་མ་གཞན་རྣམས་ལ་མཆོད་བསྟོད་གཞུང་བཞིན་བྱས་ལ། གཏོར་མ་དང་། ནང་ནུབ་ཚ་བ་གཡོ་དུས་དང་། སྦྱིན་སྲེག་གཞུང་
བཞིན་བྱེད་དུས་སུ་སྲོག་སྔགས་ལ། ཁམས་གསུམ་དབང་སྡུད་ཀྱི་སྔགས་ལ་པུ་ཙ་ཁའི་བཏགས་ལ། དེ་མ་ཡིན་པའི་སྤྱན་འདྲེན། བསྟོད་བསྐུལ་གཏོར་སྔགས་མགོན་པོའི་གཞུང་བཞིན་བྱེད་པ་གནད་ཡིན་གསུང་། རྗེས་བསྔོ་
བ་དང་མི་དམིགས་པས་རྒྱས་འདེབས་ཤིང་། བཀྲ་ཤིས་བཀའ་རྒྱ་མ་བརྗོད་དོ། །བདག་ཁྱུང་པོ་རྣལ་འབྱོར་པས་ཞལ་གདམས་ཡི་གེར་བཀོད་པ་བླ་མ་མགོན་པོ་མཁའ་འགྲོས་བཟོད་པར་མཛོད། གསེར་ཆོས་རྣམས་ཀྱི་
ནང་ནས་མགོན་པོའི་བཀའ་རྒྱ་མ་འདི་རིན་ཆེན་བརྩོན་འགྲུས་ཁྱོད་ལ་གཏད་དོ། །ཆིག་རྒྱུད་ལས་མ་སྤེལ་ཞིག །ཨྀཚ།། བླ་མ་དམ་པ་རྣམས་ལ་ཕྱག་འཚལ་ལོ། །ལས་ཁ་ཚར་འདི་ལ་ཞི་བ་ནོར་དུ་སྒྲུབ་པ་དང་། 
1-319
དྲག་པོ་མཐུ་རུ་སྒྲུབ་པ་གཉིས་ལས། འདིར་མྱུར་མཛད་ཅེས་པ་ལ་བརྟེན་ནས་ཞི་བ་ནོར་དུ་བསྒྲུབ་པའོ། །དེ་ལ་དང་པོ་དཀྱིལ་འཁོར་བྲི་བ་དང་། བུམ་པ་བཅའ་བ་དང་། རྫས་རྣམས་བསོག་པ་
དང་། ལྷ་བསྐྱེད་པ་དང་། བསྙེན་པ་སྐྱེལ་བ་དང་། རྟགས་ཐོན་པའོ། །དེ་ལ་དཀྱིལ་འཁོར་བྲི་བ་གཞུང་ལྟར་བྱ། བུམ་པ་བཅས་པ་དཀྱིལ་འཁོར་བྲིས་པའི་སྟེང་དུ་མཉྫི་ལ་སོགས་པའི་ཁར་བཞག གཟུངས་ཐག་
ནང་རྫས་སོགས་དང་ལྡན་པར་བྱ། མཆོད་གཏོར་རྒྱས་པར་བཤམ། སྭ་བྷཱ་ཝའི་སྔགས་ཀྱིས་སྟོང་པར་སྦྱངས། སྟོང་པའི་ངང་ལས་བྷྲཱུྃ་ལས་བུམ་པ་ནང་གཞལ་ཡས་ཁང་དུ་བསམ། པད་མ་དང་ཟླ་བའི་གདན་
ཏེ་སུ་ཧྲིཿའམ་གྷ་ཏའི་ཡིག་འབྲུ་ལས་འོད་འཕྲོས། འགྲོ་བའི་དོན་བྱས་ཡིག་འབྲུ་ལ་ཐིམ། ཧྲིཿལས་མགོན་པོར་དཀྲོངས་ཀྱིས་བསྐྱེད་དེ། དེ་ཡང་སྐུ་མདོག་དཀར་པོ། །ཞལ་གཅིག་ཕྱག་དྲུག་པ་གཡས་དང་པོ་ན་
ཡིད་བཞིན་གྱི་ནོར་བུ་རིན་པོ་ཆེ། གཉིས་པ་ན་ནེའུ་ལེ། གསུམ་པ་ན་བུམ་པ། གཡོན་དང་པོ་ན་གཅོད་པའི་འཁོར་ལོ། གཉིས་པ་ན་ནེའུ་ལེ། གསུམ་པ་ན་འགུགས་པའི་ཕྱག་རྒྱ་མཐེ་བོང་
དང་སྲིན་ལག་སྤྲད་པའོ། །དེ་ནས། ཡེ་ཤེས་དགུག་གཞུག་དབང་སྐུར་རྫོགས། །བྱང་ཆུབ་སེམས་ཀྱིས་ཐོག་དྲངས་ལ། །ཡན་ལག་བདུན་པ་རྫོགས་པར་བྱ། །དེའི་ཐུགས་ཀའི་ཧྲིཿལས་ནི། །སྔགས་ལ་བཤམ་བུར་བཅས་པས་སྐོར། །
1-320
གྷའམ་ཧྲིཿལས་འོད་འཕྲོས་པས། །སྤྱན་དྲངས་གཉིས་སུ་མེད་པ་བསྟིམ། །གཟུངས་ཐག་བཟུང་ལ་སྙིང་པོ་བཟླས། །ལྷ་ཡི་ཐུགས་དམ་རྒྱུད་བསྐུལ་ནས། །འོད་བྱུང་བུམ་པའི་རྫས་ལ་ཕོག །རིན་པོ་ཆེ་དང་བདུད་རྩིར་གྱུར། །
ཕྱོགས་བཅུའི་འཇིག་རྟེན་ཐམས་ཅད་ཀྱི། །དགོས་འདོད་མ་ལུས་འོད་ཀྱིས་བཀུག །ནོར་གྱི་ཆར་པ་ཕབ་བྱས་ཏེ། །བུམ་པའི་ནང་དུ་ཐིམ་པར་བསམ། །ཨོཾ་བཛྲ་མ་ཧཱ་ཀཱ་ལ་ག་ན་པ་ཏ་ཡེ་སྭཱཧཱ།
ཞེས་བྱ་བ་ཡི་སྙིང་པོ་ནི། །སྨྲ་བཅད་ཁམས་ཀྱིས་ཐུབ་ཚད་བགྲང་། །གསོལ་བ་འདེབས་ལུགས་འདི་བཞིན་བྱ། །ཇོ་བོ་གཟིགས་ལྡན་བདག་ལ་དགོངས་སུ་གསོལ། །བདག་མིང་འདི་ཞེས་བྱ་བ་ཡིས། །རྫོགས་པའི་བྱང་
ཆུབ་སྒྲུབ་པ་ལ། །སྦྱིན་པ་ཡོངས་སུ་རྫོགས་བྱའི་ཕྱིར། །འབྱོར་པ་ཆེན་པོའི་དངོས་གྲུབ་གསོལ། །ཞེས་གསོལ་བ་ལན་བདུན་གདབ་བོ། །རྟགས་ནི་འདི་ལྟར་ཤེས་པར་བྱ། །སྒྲུབ་པ་བྱེད་པའི་དུས་སུ་ནི། །ནོར་
རྫས་འབུལ་བ་བྱུང་ན་བཟང་། །ཞལ་མཐོང་བ་ནི་མཆོག་ཡིན་ནོ། །རྨི་ལམ་རྟགས་ནི་འདི་ལྟ་སྟེ། །མེ་ཏོག་འཐུ་དང་བཙས་མ་རྔ། །གཞན་གྱིས་ཟས་ནོར་འབུལ་བ་དང་། །ཕྱིང་བ་གོས་དཀར་གྱོན་པ་
དང་། །ཆུ་ཡིས་ལོངས་སྤྱོད་བྱེད་པ་དང་། །གོ་ཆ་དམག་མི་རྨི་ན་བཟང་། །སྒྲུབ་པ་ཐོན་པའི་དུས་སུ་ནི། །བུམ་པའི་ནས་ནི་རང་ཉིད་བཟའ། །དངོས་གྲུབ་བླང་བའི་དོན་ཡང་ཡིན། །མ་གྲུབ་ལན་གསུམ་བསྐྱར་བར་བྱས། །
1-321
དངོས་གྲུབ་བྱུང་བའི་རྫས་རྣམས་ལ། །རྟེན་བཞེངས་སྒྲུབ་ལ་བརྩོན་པར་བྱ། །དཀོན་མཆོག་གསུམ་ནི་མཆོད་པར་བྱ། །དབུལ་པོ་རྣམས་ཀྱི་དོན་ཡང་བྱ། །རང་ལ་ཞེན་ཆགས་མེད་པར་བྱ། །དེང་ནས་བྱང་ཆུབ་སྙིང་
པོའི་བར། །ཁོ་ཡིས་ཡོན་བདག་བྱེད་པར་འགྱུར། །འདིའི་ཡིག་སྣ་ཡོད་པ་ཙམ་གྱིས་བང་སོ་འཕེལ། འབྲུ་འཁྲུངས། ཚོང་ལེགས་འོང་། བསམ་པ་འགྲུབ་བོ། །གཏོར་མ་ཆེ་བ་རྟག་ཏུ་གཟུང་། གཏོར་ཆུང་ཞག་རེ་ལ་
ཉི་ཤུ་རྩ་གཅིག་རེ་བཏང་། སྒྲུབ་པ་བྱེད་པའི་དུས་སུའོ། །བསྒྲུབ་པའི་དུས་ནི་ཡར་ངོའི་ཚེས་བརྒྱད་ནས་གནམ་སྟོང་གི་བར་ལ་བྱའོ། །གུ་ཧྱ་ས་མ་ཡ། ཨྀཚ།།
༄། །མགོན་པོ་གཟིགས་ལྡན།
༄༅། །མགོན་པོ་གཟིགས་ལྡན་ཐུགས་རྗེ་
ཅན་ལ་ཕྱག་འཚལ་ལོ། །བུམ་པ་ཁ་ཡངས་ཤིང་མཆུ་ཡོངས་སུ་གྲགས་པ་དང་ལྡན་པ། མ་ཆག་མ་གས་ལྷན་པ་མེད་པ་དྲི་མ་དང་བྲལ་ཞིང་གཙང་བའི་ནང་ནས་དཀར་མོ་སད་ལ་སོགས་
པའི་སྐྱོན་དང་བྲལ་ཞིང་། སྦུར་སོག་དང་སྲན་མ་དང་རྡོ་ལ་སོགས་པ་གཅིག་ཀྱང་མེད་ཅིང་ས་ལ་སོགས་པ་དང་བྲལ་བ། ཕྱུག་པོའི་བང་མཛོད་ནས་བྱུང་བའམ་ཡང་ན་འབྲས་དཀར་མོ་མ་གྲུག་
པ་སྟེ། དེ་གཉིས་གང་ཡང་རུང་བས་ཁེངས་པར་དགང་། དེའི་ནང་དུ་གསེར་དངུལ་མུ་ཏིག་བྱི་རུ་མུ་མེན་གཡུ་རྙིང་ཟངས་དང་། པད་མ་ར་ག་དུང་ལ་སོགས་པའི་རིན་པོ་ཆེ་རྙེད་ཚད། གོས་དར་བཟང་པོའི་རས་མ་རིགས་མི་གཅིག་པ་རྙེད་ཚད། 
1-322
ཇ་དཀར་ནག་དང་ཤ་མར་བུ་རམ་ཀ་ར་རྒུན་འབྲུམ་ལ་སོགས་པའི་ཟས་སྣ་བཟང་པོ་རྙེད་ཚད་ཨ་རུ་ར་རྙེད་ཚད་རྣམ་རྒྱལ་ལམ། མ་རྙེད་ན་ཡང་གཞན་གསེར་མདོག་བཟང་པོ་དང་། བཟང་
དྲུག་དང་ག་བུར་ཨ་ཀ་རུ་ཙནྡན་དཀར་དམར་དབང་ལག་ལ་སོགས་པ་རྣམས་ཞུགས་ཅིང་། དེའི་དབུས་བུམ་པའི་མགྲིན་པ་དང་ལྟེ་བའི་མཚམས་ལས་ཅུང་ཟད་མཐོ་བ་ཙམ་དུ་མགོན་པོ་གཟིགས་ལྡན་གྱི་
སྐུ་ཙཀླི་རབ་གནས་ཚུལ་བཞིན་དུ་བྱས་པ་ཞལ་བུམ་པའི་མཆུ་ལ་བསྟན་ཅིང་བུམ་རྫས་ཀྱི་ནང་དུ་ནུབ་པ་བཞུགས་སུ་བཅུག བུམ་པའི་མཆུ་རང་ལ་བསྟན། ཞག་རེ་ལ་ཐུན་བཞིར་མགོན་པོ་བསྐྱེད།
ཡེ་ཤེས་པ་གཞུག གསོལ་བ་ཤུགས་དྲག་ཏུ་གདབ། གཏོར་མ་ཆེ་བའི་ནང་དུ་གཏོར་ཆུང་བཏབ། གཏོར་མ་ཆེ་བ་ནི་ནས་དཀར་གཙང་མའི་རྗེན་བཏགས་ལ་དཔལ་བཤོས་ཟུར་གསུམ་ཁྲུ་གང་བ། མར་དང་
སྦྲང་རྩི་དང་བུ་རམ་གྱིས་བརྒྱན་ཅིང་རྩེ་མོར་མར་གྱི་ནོར་བུ་འབར་བ་དང་། མདུན་ཕྱོགས་ཀྱི་ལོགས་ལ་མར་གྱི་ཧཱུྃ་དཀར་པོ་ཆེན་པོ་བྲིས་པ། མཐེབ་ཀྱུ་བརྒྱ་རྩ་བརྒྱད་ཀྱིས་བཅད་ཁ་ནང་
དུ་བསྟན་ནས་བསྐོར་བ། སྣོད་ཟངས་ཀྱི་ཀ་ཏོ་ར་ལ་སོགས་པ་གས་ཆག་དང་བུག་པ་དང་། ལྷན་པ་སོགས་མེད་པའི་ཆེན་པོར་བྱ། སྐུ་ཙཀླི་དང་མེ་ལོང་དང་དར་དཀར་དམར་མཐིང་གསུམ་གྱི་མདའ་བྱ་རྒོད་མ་སྒྲོས་མེས་མ་རེག་པ་ལ་བརྒྱན་པའི་མདའ་དར་གཟུགས། 
1-323
ཐུན་དང་པོ་ལ་གཏོར་ཆུང་གཅིག་བླ་མ་དང་ཡི་དམ་ལ་དབུལ། དེ་མ་གཏོགས་ཐུན་བཞི་པོ་རེ་རེ་ལ་གཏོར་ཆུང་ལྔ་ལྔ་མགོན་པོ་ལ་དབུལ། གཏོར་མ་ཆེ་བ་དང་པོ་ནས་སྣོད་ཁེངས་
པ་མཐེབ་ཀྱུ་སྣོད་ལས་ཕྱིར་མ་ཐལ་བ་བྱ། གཏོར་ཆེན་མགོན་པོར་བསྐྱེད། ཡེ་ཤེས་པ་བཅུག་དེ་དང་བུམ་པའི་ནང་གི་མགོན་པོ་དབྱེར་མེད་པར་མོས་ནས་གཏོར་ཆུང་དབུལ། གཏོར་ཆུང་ནི་གཏོར་མ་
ཆེ་བའི་མདུན་དུ་སྣོད་གཞན་བཞག་པའི་ནང་དུ་དབུལ་དུ་རུང་། གཏོར་མ་བྱིན་བརླབ་གཞུང་བཞིན་ནོ། །གཏོར་ཆུང་འབུལ་བའི་ཚེ། རེ་རེ་ནས་ལག་པ་གཡས་པས་བཟུང་སྟེ་རྩ་སྔགས་སི་ཏི་མ་ཡི་
གེ་བཅུ་པའི་མཐར་བ་ལིཾ་ཁ་ཁ་ཁཱ་ཧི་ཁཱ་ཧི། བཏགས་ནས་དབུལ།སྒྲུབ་པ་ཐོན་ཁའི་ཐུན་ཐ་མ་ལ་གཏོར་མ་ཆེ་བའི་མགོན་པོ་ནམ་མཁའ་ལ་བཞུགས་སུ་གསོལ་ནས། གཏོར་མ་ཆེ་བ་
ལེགས་པར་བྱིན་གྱིས་བརླབས་ཏེ་དབུལ། ཐུན་ཐམས་ཅད་ལ་ཡང་གཏོར་མ་ཆེ་བ་མཐེབ་ཀྱུ་རེ་རེས་གསོ། སྒྲུབ་པའི་བར་ལ་མཚམས་དམ་པར་བཅད། གཞན་ལ་གསང་། ངག་བཅད། སྒྲུབ་རྫས་ཕྱིར་མི་འདོན། སྟན་
མི་སྤྲུག ཕྱག་དར་མི་བྱ། དབང་སྡུད་ཀྱི་འཁོར་ལོ་བྲིས་རབ་གནས་བྱས་པ་སྐུད་པ་དམར་པོས་དཀྲིས་ཏེ་བསྒྲུབ་པའི་བར་བུམ་པའི་མགུལ་བར་བཏགས་པ་ལ། སྒྲུབ་པ་ཐོན་དུ་ཉེ་བའི་ཐུན་ཐ་མའི་ཚེ། 
1-324
གཏོར་མའི་མགོན་པོ་ནམ་མཁར་བཏེགས་པ་དེ་ལ་གཏོར་མ་ཕུལ་ཚར་ནས་འཁོར་ལོ་ལ་བསྟིམས་ཏེ། འཁོར་ལོ་རང་གི་ལུས་ལ་བཅངས་པས་གང་འདོད་པ་དབང་དུ་འགྱུར་རོ། །སྒྲུབ་པ་ཐོན་ནས་ཐོད་
པ་དུམ་བུ་གཅིག་པ་མཚན་ལྡན་གྱི་ནང་དུ་སྔར་གྱི་བུམ་རྫས་རྣམས་ནས་དང་བཅས་པས་བཀང་བའི་ནང་དུ་བུམ་པའི་ནང་གི་སྐུ་ཙཀླི་ཞལ་ཐོད་པའི་དཔྲལ་བ་ལ་བསྟན་སྐུ་ནས་ལ་ནུབ་
པ་བྱས་ཏེ་བཅུག་པ་རང་གི་ཉལ་བའི་ཁང་པའམ་རང་གི་མཆོད་ཁང་དུ་གཞན་གྱིས་མི་མཐོང་བར་བཞུགས་སུ་བཅུག་པའི་མདུན་དུ་འཛིན། གཏོར་བཅས་ཏེ། ནུབ་རེ་ཞིང་གསོ་ཞིང་དབུལ། གཞན་པའི་རྫས་
ཀྱི་ནས་འབྲས་ལྷག་མ་རང་ཁོ་ནས་ལོངས་སྤྱོད་ཅིང་། སྒྲུབ་པའི་གཏོར་མ་ཡང་རང་ཁོ་ནས་དངོས་གྲུབ་དུ་བླང་། བསྒྲུབ་རྫས་རྣམས་དང་པོ་འཚོལ་བའི་ཚེ། དམ་ཉམས་དང་གྲིབ་ཅན་གྱི་ལག་ནས་བྱུང་
བ་དང་མ་འདྲེས་པ་བྱ་ཞིང་བསངས་སྦྱངས་ལེགས་པར་བྱས་ནས། གུ་གུལ་གྱིས་བདུག་ཅིང་བུམ་པའི་ནང་དུ་གཞུག་པར་བྱ་ཞིང་། ཆང་ཕུད་དང་གཏོར་ཆེ་མ་འབགས་པ་གལ་ཆེ། ཞལ་ཤེས་ཞིབ་པར་
ཡི་གེར་བཀོད་པ་ཡིན་པས་ཆེས་ཤིན་ཏུ་གསང་བར་བྱ་ཞིང་། དཔེ་སུ་ལ་ཡང་མི་བསྟན་ནོ། །གུ་ཧྱེ་ས་མ་ཡ། མགོན་པོ་གཟིགས་ལྡན་འདི་ནི་ཡིད་བཞིན་ནོར་བུ་ཉིད་ལས་སྦྱོར་གྱི་ཚེ་ཕྱག་མཚན་སོགས་ཅུང་ཟད་བསྒྱུར་བ་ཙམ་ཡིན་པས་འདི་ལ་རྗེས་གནང་དང་བཀའ་ལོགས་སུ་བྱེད་པ་ནི། 
1-325
རྗེས་གནང་གི་གྲངས་ལ་གཙོ་བོར་བྱེད་པ་རྣམས་ཀྱི་རང་བཟོ་ཡིན་གྱི་བདག་གི་བླ་མ་དག་དེ་འདྲ་མི་བཞེད་དོ།། ༈ །།
༄། །མགོན་པོའི་སྦྱིན་སྲེག།
༄༅། །ན་མོ། དང་པོར་བྱིན་གྱིས་བརླབས་པའི་ནག་པོ་ཆེན་པོའི་བསྙེན་
པ་གྲངས་ཚད་རྫོགས་པར་བྱ། དེ་ནས་མགོན་པོ་ཡིད་བཞིན་ནོར་བུའི་བསྙེན་སྔགས་སི་ཏི་མ་ལ་བསྙེན་པ་གྲངས་ཐིམ་པ། དངོས་སམ། ཉམས་སྣང་ངམ། རྨི་ལམ་གྱི་རྟགས་གང་ཡང་རུང་བ་ཐོན་ངེས་
པ་བྱ། དེ་ནས་མགོན་པོ་གཟིགས་ལྡན་དང་། སྔགས་ག་ན་པ་ཏི་དང་། རྫས་བུམ་པ་དང་། འཁོར་ལོ་སོགས་ལ་བརྟེན་པའི་སྒྲུབ་པ་དང་ལས་སྦྱོར་རྣམས་ཉམས་སུ་ལེན་པ་ལ་འཇུག་པ་ཡིན་ནོ། །
གཏོར་མ་ལྷ་རུ་བསྐྱེད་པ་ཡིན་ན། གཏོར་མའི་ལོགས་ལ་མར་གྱིས་ཧཱུྃ་བྲི། ལྷ་རུ་མི་བསྐྱེད་པའི་འཛིན་གཏོར་ནར་མ་སོགས་ལ་མར་དང་བུ་རམ་གྱིས་ནོར་བུ་བྱེད་ཀྱི། ཧཱུྃ་བྲི་བ་མ་
ཡིན་ནོ། །གུ་ཧྱ་ས་མ་ཡ་ཨྀཚ། མགོན་པོའི་སྦྱིན་སྲེག་ལ་གཉིས་ལས། རྒྱས་པའི་སྦྱིན་སྲེག་བྱེད་ན། ཐབ་ལ་སོགས་པ་ཐམས་ཅད་སྤྱི་དང་མཐུན་པར་བྱས་ལ་མེ་ཏོག་སེར་པོ་ལ་སོགས་པའི་
བསྲེག་རྫས་དང་། མགོན་པོ་ཡིད་བཞིན་ནོར་བུ་ཐུགས་ཀའི་མཁའ་འགྲོ་མ་དང་བཅས་པ་ཐབ་ནང་དུ་འཇིག་རྟེན་པའི་མེ་ལྷའི་ཐུགས་ཀའི་མེ་གྲུ་གསུམ་གྱི་དབུས་སུ་བསྐྱེད་ནས་ཡེ་ཤེས་པ་གཞུག་པ་སོགས་བྱས་ཏེ། 
1-326
འདས་པའི་མེ་ལྷ་ལ་བསྲེག་རྫས་བརྒྱ་རྩ་བརྒྱད་རེ་དབུལ་བ་ལ། སྔགས་ནི། གུ་རུ་མ་ཧཱ་ཀ་ལ་ཡ། ཧ་རི་ནི་སི་ཏི་ཛ། བདག་མིང་འདི་ཞེས་བྱ་བའི་འཁོར་ལོངས་སྤྱོད་ནོར་དང་
འབྲུ་དང་རིན་པོ་ཆེ་ལ་སོགས་པ་འབྱོར་པ་ཕུན་སུམ་ཚོགས་པ་ཐམས་ཅད་པུཥྚིཾ་ཀུ་རུ་ཨོཾ། ཞེས་སྔགས་རེ་དང་། རྫས་རེ་སྤེལ་ལ་དབུལ། དེ་ནས་འདས་པའི་མེ་ལྷ་ཡེ་ཤེས་པ་གཤེགས། དམ་
ཚིག་པ་རང་ལ་བསྡུས། འཇིག་རྟེན་པ་ལ་ལྷག་མ་ཕུལ་ནས་འཇིག་རྟེན་པའི་མེ་ལྷ་ཡེ་ཤེས་པ་གཤེགས། དམ་ཚིག་པ་མེ་འབར་བའི་རྣམ་པར་གྱུར་པ་སོགས་ཆོ་ག་སྤྱི་དང་འདྲའོ། །དབང་སྡུད་
ལ་ཐབ་ཟླ་གམ་དཀྱིལ་འཁོར་དམར་པོ་བྲིས་པའམ། རྩིག་པ་ལ་བསྲེག་རྫས་སོགས་ཆོ་ག་གཞན་ཐམས་ཅད་དབང་གི་སྦྱིན་སྲེག་གི་ཆོ་ག་དང་མཐུན་པ་དང་། མགོན་པོའི་ཐུགས་ཁའི་མཁའ་འགྲོ་མ་དང་
བཅས་པ་ལ་བསྲེག་རྫས་འབུལ་བའི་ཚེ། གུ་རུ་མ་ཧཱ་ཀཱ་ལ་ཡ། ཧ་རི་ནི་སི་ཏི་ཛ། ཆེ་གེ་མོ་ཝ་ཤིཾ་ཀུ་རུ་ཧོཿ ཞེས་སྔགས་རེ་དང་རྫས་རེ་སྤེལ་ནས་འབུལ་བའི་དུས་
སུ། ཐུགས་ཁའི་མཁའ་འགྲོ་མ་ལས་དེ་འདྲ་བ་དཔག་ཏུ་མེད་པ་འཕྲོས་པས་བསྒྲུབ་བྱའི་སྙིང་ཁའམ། བྷ་ག་ནས་ལྕགས་ཀྱུས་བཀུག ཌཱ་མ་རུའི་སྒྲས་སེམས་མྱོས་པར་བྱས་ཏེ། རང་དབང་མེད་པར་བཀུག་ནས་བདག་གི་རྐང་པའི་དྲུང་དུ་བཞག་པར་མོས་པ་ཡང་ཡང་བྱའོ། །
1-327
ཐུག་པ་བསྐོལ་བའི་མེ་ལ་ཡང་བསྐྱེད་ཆོག་མདོར་བསྡུས་བྱས་ནས། ཚྭ་དང་ཕྱེ་མར་ལ་སྔགས་དང་བཅས་ནས་ཅུང་ཟད་རེ་འབུལ་བའི་སྦྱིན་སྲེག་བྱར་རུང་གསུང་མོད། རྒྱུད་སྡེ་ལྟར་བྱས་ན་ལེགས་སམ་
སྙམ་མོ། །ཨྀཚ།།
༄། །ཆོས་སྐྱོང་གི་བུམ་པ་བཅའ་བའི་ཐབས།
༄༅། །ན་མོ་གུ་རུ། ཆོས་སྐྱོང་གི་བུམ་པ་བཅའ་བའི་ཐབས་ནི། དང་པོ་བུམ་པ་སོ་མ་བཏང་བ། མ་སྤྱད་པ་ཚད་བྲེ་གང་ཤོང་བ་ཡན་ཆད་མཆུ་ཅན། མགྲིན་པར་བཀྲ་
ཤིས་རྫས་བརྒྱད་བྲིས་པའི་ནང་དུ་ཆོས་སྐྱོང་གི་གཟུགས་དང་། རྩ་བའི་སྔགས་སི་ཏི་མའི་མཇུག་ཏུ། འདོད་པའི་དོན་ཞུ་བའི་ཚིག རྟེན་འདི་ལ་གནས་པར་མཛད་དུ་གསོལ། གནས་འདིར་སྐྱེ་བོ་ཐམས་ཅད་
གུས་པས་འདུ་ཞིང་། འབྱོར་པ་ཐམས་ཅད་ཆུ་བོའི་ཚོགས་བཞིན་འདུ་བར་མཛད་དུ་གསོལ། ཞེས་པ་དང་། བསྲུངས་གཅིག་ལ་སོགས་པ་བཏང་ལ་དེ་འདྲ་བ་མཐིང་ཤོག་ལ་གསེར་གྱིས་བྲིས་པ་དང་། ག་བུར།
གུར་གུམ། ཙན་དན་དམར་པོ། རང་བྱུང་། གྷི་ཝཾ་ལ་སོགས་པས་བྲིས་པ་ཕྱོགས་བཞི་ནས་དབུས་ཀྱི་སྐུ་གཟུགས་ལ་ཁ་བསྟན་ཏེ་བཞག སྐུ་རབ་གནས་ལེགས་པར་བྱས་པའི་ཞལ་བུམ་པའི་མཆུ་ལ་བསྟན།
བུམ་རྫས་རིན་པོ་ཆེ་སྣ་ཚོགས་པ་དང་། སྨན་སྣ་ཚོགས་པ་དང་། འབྲུ་སྣ་ཚོགས་པ་དང་། དར་ཟབ་སྣ་ཚོགས་པ་དང་། མངར་གསུམ་ལ་སོགས་པའི་ཟས་སྣ་ཚོགས་པ་དང་། མགོན་པོའི་དམ་རྫས་སྣ་ཚོགས་བཅུག་ལ། 
1-328
ཁེངས་པར་བཀང་། ལུག་དར་མའི་སོག་པ་གཡས་པའི་བལ་ཚི་མེད་པས་ཁ་བཅད། དེ་ནས་ཚོན་སྣ་ལྔའི་སྐུད་པས་མགུལ་བ་བཅིངས་ལ། དེ་རྗེས་ཁའི་སྟེང་ནས་རྒྱ་གྲམ་དུ་བཅིང་ངོ་། །དེ་ནས་རང་
གི་གནས་ཁང་གི་མཛོད་དམ། དགེ་འདུན་གྱི་གཙུག་ལག་ཁང་གི་ཁྱམས་ཀྱི་ནང་ལ་སོགས་པར་གྱང་ལོགས་ལ་ཐོག་མཚམས་ལས་ཅུང་ཟད་དམའ་བར་ཁུང་བུ་གྲུ་བཞི་པ་དཔངས་སུ་ཁྲུ་གང་བ་བྱས་
པའི་ནང་ལ་ཞལ་ཞལ་ལེགས་པོ་བྱས་མཚལ་གྱིས་བྱུག སིནྡྷུ་རའི་གཡུང་དྲུང་རིས་ཕྱོགས་བཞིར་བྲིས། དེའི་ནང་དུ་མཐིང་ཤོག་ལ་གསེར་གྱི་པད་མ་འདབ་བརྒྱད་བྲིས་པ་གདིང་། དེའི་སྟེང་དུ་བུམ་པ་དར་
ཚོན་ལྔ་སྣ་ལྔའམ་ཚོན་སྐུད་སྣ་ལྔས་བརྒྱ་གྲམ་དུ་བཅིངས་ནས་ཞལ་ཁང་པའི་ཕུགས་སམ། གཙང་ཁང་སོགས་ལ་བསྟན་ལ་བཞག དེའི་སྟེང་ནས་དར་ནག་གི་གུར་དབུབ། མདུན་དུ་མར་གྱི་གཏོར་མ་ནོར་
བུས་བརྒྱན་པ་བཞག རང་ཡི་དམ་དུ་གསལ་བའི་ཐུགས་ཁ་ནས་འོད་འཕྲོས་པས། ལྷོ་ཕྱོགས་བསིལ་བའི་ཚལ་ནས་མགོན་པོ་སྤྱན་དྲངས་ནས་བུམ་པའི་ནང་དུ་བསྟིམས་པ་དང་། གསོལ་བ་བཏབ་ནས་བརྟན་པར་
བཞུགས་པ་ལན་བརྒྱ་རྩ་བརྒྱད་དམ། ལྔ་བཅུའམ་ཉེར་གཅིག་བྱ། མཆོད་བསྟོད་གཏོར་མ་དབུལ། རང་དང་བུམ་ནང་གི་མགོན་པོའི་ཐུགས་ཁའི་མཁའ་འགྲོ་མ་ལས་དེ་འདྲ་བ་དཔག་ཏུ་མེད་པ་འཕྲོས་པས་ལྷ་དང་མིའི་རིན་པོ་ཆེ་དང་འབྱོར་པའི་ཁྱད་པར་ཅི་ཡོད་པ་བཀུག་སྟེ། 
1-329
བུམ་པའི་ནང་གི་རིན་པོ་ཆེ་ལ་སོགས་པ་རྣམས་ལ་ཐིམ་པ་ཡང་ཡང་བསྒོམས་ནས། བུམ་པའི་མགུལ་པ་ལ་གཟུངས་ཐག་བཏགས་ལ་བཟུང་སྟེ། རྩ་སྔགས་སི་ཏི་མ་སྟོང་བཟླས། བུམ་པའི་ནང་གི་
ནོར་ཟས་རྣམས་ལུད། མགོན་པོའི་ཕྱག་གི་བུམ་པ་དང་། ཐོད་པ་ནས་ཀྱང་ལུད། ནེའུ་ལེ་དང་ཚོགས་བདག་གི་ཁ་བཤང་རྣམས་ནས་ཀྱང་རིན་པོ་ཆེ་ལྷུག་ལྷུག་ལུད་ནས་གནས་ཁང་དང་གཙུག་ལག་ཁང་
ལ་སོགས་པའི་ནང་ཐམས་ཅད་སྤྱད་པས་ཟད་མི་ཤེས་པ་ཙམ་དུ་ཁེངས་པར་བསམས་ལ། བཀྲ་ཤིས་བྱ། བུམ་པ་གཏོར་མ་དང་བཅས་པ་མི་འགུལ་བར་གཡམ་པ་གྲུ་བཞི་ནང་ལ་གཡུང་དྲུང་རིས་
བྲིས་པས་ཁ་བཅད། ཕྱི་ནས་ཞལ་ཞལ་བྱས་ཏེ་མི་མངོན་པར་བྱ། དེ་ལྟར་བྱས་ན་གནས་དེར་འབྱོར་པ་ཟད་མི་ཤེས་པ་འབྱུང་སྟེ། ཐུན་མོང་མ་ཡིན་པའི་མན་ངག་ཆེས་ཟབ་པ་ཡིན་ཞིང་།
ཞལ་ཤེས་རྣམས་ཀྱང་ཡི་གེར་བཀོད་པ་ཡིན་པས་དཔེ་གཞན་ལ་མི་བསྟན་པ་ཆེས་ཆེར་དམ་པར་བྱའོ།། །།གུ་ཧྱ་ས་མ་ཡ། །རྒྱ་རྒྱ་རྒྱ་ཨྠིྀཚ།།
